भारताच्या महत्त्वाकांक्षी गगनयान मानवी अंतराळ मोहिमेची तयारी अंतिम टप्प्यात पोहोचली आहे. गगनयात्रींनी रशियातील ग्लावकोसमॉस येथे प्राथमिक प्रशिक्षण पूर्ण केले असून, सध्या बंगळुरू येथील अंतराळवीर प्रशिक्षण केंद्रात मिशन-विशिष्ट प्रशिक्षण सुरू आहे.
मोहिमेसाठी मानव-रेटेड HLVM3 प्रक्षेपण यानाच्या प्रणोदन टप्प्यांचे विकास व भू-चाचण्या पूर्ण झाल्या आहेत. तसेच क्रू मॉड्यूल आणि सर्व्हिस मॉड्यूलच्या प्रणालींचे एकत्रीकरण व चाचण्या अंतिम टप्प्यात आहेत. क्रू एस्केप सिस्टिम आणि पॅराशूट प्रणालीच्या महत्त्वाच्या चाचण्याही यशस्वी झाल्या आहेत.
पहिली मानवरहित G1 मोहीम २०२६ च्या चौथ्या तिमाहीत नियोजित असून, त्यानंतर आणखी दोन मानवरहित मोहिमा घेण्यात येणार आहेत. या चाचण्यांनंतर भारताची पहिली मानवी अंतराळ मोहीम २०२७ मध्ये करण्याचे लक्ष्य ठेवण्यात आले आहे.
गगनयान मोहिमेच्या यशासाठी अंतराळवीरांचे प्रशिक्षण, तांत्रिक चाचण्या आणि आपत्कालीन परिस्थितीतील तयारीवर विशेष भर दिला जात आहे.
